ក្នុងរយៈពេលជាង ២ ទសវត្សមកហើយ ដែល Toyota Corolla ស្ថិតនៅគ្រងដំណែងជារថយន្ដដែលលក់ដាច់ជាងគេ លើពិភពលោក (World’s Best Selling Car) ក៏ប៉ុន្ដែលទ្ធផលសម្រាប់ឆ្នាំ ២០២៣ បានបង្ហាញថារថយន្ដអគ្គិសនី Tesla Model Y បានសម្រេចយកឈ្នះ Toyota Corolla ក្លាយជារថយន្ដដែលលក់ដាច់ជាងគេលើពិភពលោកសម្រាប់ឆ្នាំ ២០២៣ និងធ្វើឲ្យក្រុមហ៊ុន Tesla ក្លាយទៅជាក្រុមហ៊ុនរថយន្ដអគ្គិសនីដំបូងគេដែលកាន់ដំណែងនេះ។ 

យោងតាមរបាយការណ៍ពី Jato Dynamics បានឲ្យដឹងថា សម្រាប់ឆ្នាំ ២០២៣ Tesla Model Y សម្រេចការលក់បាន ១.២២ លានគ្រឿង ដែលកើនឡើងជាងទិន្នន័យឆ្នាំមុនរបស់ខ្លួនដល់ទៅ ៦៤% ខណៈ Toyota Corolla សម្រេចការលក់បានតែ ៨០៣ ០០០ គ្រឿងប៉ុណ្ណោះសម្រាប់ឆ្នាំ ២០២៣ ដែលធ្លាក់ចុះប្រមាណ ១៩% ពីទិន្នន័យឆ្នាំមុន ធ្វើឲ្យអតីតរថយន្ដជើងឯកមួយនេះស្ថិតនៅដល់ចំណាត់ថ្នាក់លេខ ៤ ឯណោះ ដែលក្រោម​បងប្អូនជីដូនមួយរបស់ខ្លួនដូចជា (2) Toyota RAV4 លក់បាន ១.០៧ លានគ្រឿង និង (3) Honda CR-V លក់បាន ៨៤៦ ០០០គ្រឿង។ 

យ៉ាងណាមិញ រថយន្ដស្ថិតនៅចំណាត់ថ្នាក់បន្ដបន្ទាប់ក្នុង Top 10 ភាគច្រើនគឺសុទ្ធតែមកពី Toyota ជាក់ស្ដែង Toyota Corolla Cross ស្ថិតនៅលេខរៀងទី ៥, Toyota Camry ទី ៦ និង Toyota Hilux ស្ថិតនៅលេខ ៨ ក្រោម Ford Ranger មួយលេខ និងលើ Tesla Model 3 ពីរលេខផងដែរ។

គួរបញ្ចាក់ផងដែរ បើយោងតាមរបាយការណ៍តាមដានការលក់សម្រាប់ឆ្នាំ ២០២៤ នេះ ក្នុងកំឡុងពេល​ ១ ឆមាស កន្លងមក ឃើញថា Toyota Corrolla ចាប់ផ្ដើមមានសន្ទុះឡើងវិញដើម្បីដណ្ដើមមកវិញក្នុងឆ្នាំ ២០២៤ នេះ ខណៈការលក់របស់ Tesla វិញកំពុងតែមានភាពរអាក់រអួល ដោយតាមការឲ្យដឹងពី Focus2Move ថា លទ្ធផលការលក់របស់ Tesla Model Y ធ្លាក់ចុះ ២៩.៦% ខណៈ Toyota Corolla កើនឡើង ១១.៣% តែលទ្ធផលសម្រេចនៅចុងឆ្នាំ ២០២៤ នេះយ៉ាងណានៅមិនទាន់អាចសន្និដ្ឋានបាននោះទេ ដោយមានតែចាំមើលរបាយការណ៍ការលក់នៅឆមាសទី ២ នេះបន្ដទៀត។

អត្ថបទ៖ Andra 

ប្រភព៖ Jato

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!